A primavera plega y con ella empezipia o tiempo por eszelenzia de plantar. Pero cuán ye mas convenien plantar as tomateras…

Os mui listos y adelantaus, que siempre los i hai, los plantan a lo menos dos vezes, y beluns dica tres u mesmo cuatro. A primera ye a primers d’abril, les fan invidia os nuestros compatriotas d’a costa u d’o sur que los han plantau fa semanas, y se piensan que por meter-los debaixo d’una botella se va a recreyar o clima d’Almería y van a encomenzar a pillar-los en chunio, pero plega un maitín una rosadeta con as zagueras cheladas d’a temporada y ya son de color pardo mirando cara o suelo. En o segundo intento lo meten cuan ya han pasau o risgo de cheladas, pero vienen uns días frescos y a metat se foten y l’atra metat se quedan acojonaus. Finalmén deziden meter-los a primers de mayo y azeptar que dica chulio no´n tendrán. Y ixo os tomates, que o pimiento encara ye más delicau! En fin, os listos y adelantaus.

Tomatera chelada

En Boleya antes más no se meteban dica Santa Quiteria, o 22 de mayo, en os días posteriors a la tradizional romería d’iste lugar. Y no s’empezaba a replegar os primers dica finals de chulio.

A mayoría uei los meten a primer semana de mayo, y ye que o cambio climatico y as nuevas variedaz permiten avanzar o cautibo uns 20 días con o que se feba dinantes.

Como dizen os viellos, no merexe a pena correr, porque aquí nos domina o clima, o tomate plegará igual, pero cuan o clima diga. Asinas que dezisión nuestra si estar mui listos y adelantaus u si estar intelichens y treballar menos en l’ortal.

Arce Argudo Panadero (Boleya)