L’año 1861, os escritors Pascual Savall y Santiago Penén publicón o “Glosario de las voces provinciales y anticuadas de que se hace uso en las Ordinaciones”, fendo menzión a os testos legals que replegaban as normas que rechiban sobre mons y ortals en o termino de a ziudat de Zaragoza dende o sieglo XVI. En iste glosario podemos alcontrar 170 vozes, belunas de as cualas encara son d’emplego común en l’ampla uerta de Zaragoza, una de as más grans superfizies de regano tradizional en o surueste d’Europa.

Tastaremos una chiqueta selezión d’ellas, pero ye posible espleitar de o conchunto d’iste primer vocabulario aragonés de parolas de l’ortal punchando en iste enrastre ta un articlo sobre o tema publicau por Chusé I. López Susín.

Entre as fainas de l’ortal, cautibar yera culturar, se feban aladradas en puesto de sulcos, s’esbrozaba, s’emplegaba lo fiemo, cuan os cautibos yeran maduros se feba la cogida (cosecha), y l’alfarda yeran os diners que se pagaban por l’agua de riego.

Entre as ferramientas que feban buena onra a qui menaba l’ortal yeran l’ajada u ligona (xata), l’ajadón (xadón) y l’aradro (aladro).

Y o paisache d’ixa Zaragoza d’antis más yera a caramuello d’elementos como l’azut, o brazal, os cajeros, o ciéspet (tasca), a márquin (marguin), os pollos (caballons) y sulcos, u as torres que ye o nombre de as milenta casas de campo que bi’n ha en a uerta de Zaragoza.

Plantero de Parolas de l’Ortal