A parabra “fiemo” ye un sustantibo aragonés de dos silabas que d´azentugazión bi ye plana. Como s´ha feito de contino con bellas atras parabras, en 1846 amanexió en un dizionario de fabla castellana, u siga en un dizionario forano, estranchero. Yera o de Vicente Salvá. Un zalpau d´añadas dimpués, en 1852, de bez, amanexió en o de a RAE. A situgazión ista de fagotizazión cuentra l´aragonés ye estata cutiana dende os zaguers sieglos, lo que ha feito un drama ta ra fabla propia de o país; féndo-la más probichona.
¡Quemisió por qué quereban asinas enamplar y fer más gran una ipotetica fabla española! ¿En furtando de tresoros y d´alfayas aragonesas? Asinas? Bai! Contino!

Como a mayoría de as parabras de o idioma aragonés, “fiemo” biene de “fĕmus”, combertita en “fĭmus”, parola latina, doncas a fabla nuestra ye filla de o latín. Ye una pena que encara tiengamos que dizir as cosas istas, pero caldrá continar, terne que terne, ta dinnificar-la. Profés.

A simién de a bida

Ista alfaya natural ye, a la fin, o fruito de os repués de chentas y liquidos de os animals que, en pasando lo tiempo, se tresforman en abono enriquiu en nitroxeno. U siga, ye mierda, pero mierda sobrebuena. Cuan ye rezién feito, ulora de firme a cambos y espazios naturals. Mica dimpués, s´esbota de tot y se fa o miraglo. O fiemo fa maxia y rebilca ra bida. Fa ra bida.

Bi ha distintas clases de fiemo, tantas como d´animals en fan. Puede estar-ne de bacas, crabas, pirinas u coniellos, pero en dizen que un de os millors, ye o que en L´Almunia se diz de gallinaza.

En os tiempos d´antismás, se gosaba treballar con zestas y forcas, y ta tresportar-lo, dende o suyo puesto d´orixen dica os cambos se´n lebaban en carros u galeras. Enguán, zaga o xubliu de as trazas de culturar y treballar a tierra, y a firme dentrada de as maquinas en l´agricultura, os trautors, como granizas bestias, se´n combertioron en os amos de as planas, lastras, cambos y mons. Asinas, doncas, as galeras y os carros, mesmo que as caballerías, solo i remanen que en os esmos y remers de os biellos u en bels museyos d´un zalpau de lugars.

Encara, o reloch no se´n ye aturato pas, o tiempo ye por debán. Cal tornar ta una agricultura muito más amanata, de más calidá, que faiga onra y benefizie direutamén a os labradors d´enguán y sirba ta que os nuestros lugars y redoladas medren guallardas y en tiengan de bida rebilcadera. Bida ampla, con d´asperanzas y suenios tresformaders. Y astí, o fiemo ye un fautor prenzipal.

Gonzalo Orna Soria (La Almunia de Doña Godina)